Mendeurrena - Euskaltzaindia

‘Egunak eta lanak’ dokumentalaren bi bertsio, Youtuben ikusgai

Mendeurrenaren baitan Euskaltzaindiak EiTBren eta BBK Fundazioaren laguntzaz ekoiztutako dokumentalaren bertsio biak Youtuben daude ikusgai, hain zuzen, Akademiaren atarian.
Bernardo Atxagarena da lan honen jatorrizko ideia eta Fermin Etxegoien izan du zuzendari. Halaber, Joserra Senperenak jarri dio musika, Haizea Pastor da argazki zuzendaria eta muntaketa lanaren ardura Hodei Zanbranok hartu du. Beitturena da ekoizpena.
Bertsio laburra ikusteko: https://labur.eus/fnrCm (21'/ azpitituluak gaztelaniaz, frantsesez eta ingelesez)

Euskaltzaindiak aurkezpen bikoitza egingo du asteazkenean, urtarrilak 22 dituela, Baionako Kalostrape ostatuan (Marengo karrika). Batetik, Euskaltzaindia, euskararen 100 urteko laguna komikia eta Berri gogoa liburua aurkeztuko dira (18:00etan), eta, bestetik, Egunak eta lanak dokumentalaren bertsio laburra proiektatuko da (frantsesezko azpitituluekin), 18:45etatik aurrera. Ostean, zintzur bustitzea (sarrera doan).
Kalostrapen izanen dira Juan Luis Zabala kazetaria, Amaia Ballesteros irudigilea eta Xarles Bidegain Euskaltzaindiaren Ipar Euskal Herriko ordezkaria.

Guztira, 800.204 erabiltzaile izan ditu Akademiaren atari digitalak, eta kontsultatutako orrien kopurua % 42,12 igo da.
Plazaberri blogak gora egin du nabarmen, eta 2019ko albisterik irakurriena ondoko hau izan zen: Euskaltzaindiak genero-markarik gabeko izenak erantsi ditu pertsona-izendegian (1.279 ikustaldi).

Euskaltzaindiak R. M. Azkue (1864-1951) omendu du gaur Lekeition. Herriko Udalarekin batera antolatu duen ekitaldia Andre Mariaren Jasokundearen basilikan egin da.
Euskaltzainekin batera, ekitaldian parte hartu dute Koldo Goitia alkateak, Benito Ansola apaizak eta Itxaro Mentxaka mezzosopranoak. Bertan izan dira, baita, Bingen Zupiria Eusko Jaurlaritzako Hizkuntza Politika eta Kultura sailburua, Lorea Bilbao Bizkaiko Foru Aldundiko Euskara, Kultura eta Kirol diputatua, eta Ana Otadui Bizkaiko Batzar Nagusietako lehendakaria.
Andres Urrutia (euskaltzainburua): “Azkue, argi esan dezadan, euskal kulturaren erraldoia da, euskal kulturarako zin-zinezko tsunamia, egungo berbak erabiliz”.

Euskaltzaindiaren mendeurrenean, Akademiak gorazarrea egin nahi dio lehen euskaltzainburuari. Honela, Lekeitioko Udalarekin batera antolatu duen ekitaldia abenduaren 20an izango da, herriko Andre Mariaren Jasokundearen basilikan, 12:00etatik aurrera.
Omenaldian lore-eskaintza egingo zaio Resurreccion Maria Azkueri. Ekitaldi irekia izango da, eta Euskaltzaindiak Lekeitioko herri osoa gonbidatu nahi du bertara. Parte hartuko dute, besteak beste, Koldo Goitia alkateak, Benito Ansola apaizak eta Itxaro Mentxaka mezzosopranoak.
Gainera, Euskaltzaindiak urteko azken Osoko bilkura egingo du herriko udaletxean.

Euskaltzaindia Durangoko Azokan izango da beste behin, eta mendeurreneko ospakizunen baitan argitaratutako edozenbat lan eramango ditu bertara. Tartean, Berri gogoa liburua, Euskara Batuaren Eskuliburuaren (EBE) 3. edizio berritua, zentsura jorratzen duen Euskera agerkariaren 63 (2-2) zenbakia, Erlea 12, Euskaltzaindia, euskararen 100 urteko laguna komikia, Euskal Hiztegi Historiko-Etimologikoa (EHHE-200), Azkue Literatura sarietako irabazleen ipuin eta olerkiak biltzen dituen liburua eta beste.
Iazko Azokan harrera bikaina izan zuen Euskara Batuaren Eskuliburuaren 3. argitaraldia kaleratu du Euskaltzaindiak. Eguneratuta ageri da liburua, Akademiaren azken erabakiak jaso baitira bertan. Bertsio digitala ere kontsulta daiteke, HEMEN

Nafarroaren Egunean jaso du Akademiak Orreaga Fundazioak urtero ematen duen golardoa. Bereziki "lingua navarrorum-aren alde 100 urteko ibilbidean egin duen lana" baloratu eta saritu nahi izan dute Orreagako arduradunek.

Euskaltzaindiak Nafarroako Parlamentuaren domina jaso zuen atzo, Iruñean, eta euskararen alde lanean ari diren eragile nafarrekin partekatu nahi izan zuen aitorpena.

Euskaltzaindiaren ehun urteak direla eta, Osoko bilkuren aretoan egindako ekitaldian Nafarroako Parlamentuaren domina jaso du euskararen Akademiak. Foru legebiltzarrak ematen duen sari gorena da, eta Euskaltzaindiak "euskararen alde lanean ari diren nafar eragileekin" partekatu nahi izan du golardoa.
Unai Hualde Parlamentuko presidenteak azpimarratu du “aho batez” egiten zaiola errekonozimendua Euskaltzaindiari eta “hizkuntzaren arloko akordio zabalagoen ataria” izatea espero duela.
Andres Urrutia (euskaltzainburua): “Euskaltzaindia beti ahalegindu izan da bere eginkizuna betetzen politikaz kanpo eta politika ororen gainetik, arrazoi sinple batengatik: uste duelako euskara herri baten ondasuna dela, denon ondasuna, eta, horrexegatik, ondasun hori ezin duela baliatu ez monopolizatu inongo alderdi, sinesmen edo ideologiak”.