Plazaberri

93.366 bisita izan ditu Euskaltzaindiaren webguneak urrian

  • Udaldiko ohiko nagia atzean utzi eta gora egin du, berriz, bisitarien kopuruak. Honela, urrian 93.366 bisita jaso ditu gure web-orriak eta 445.118 bistaratze izan dira guztira.
  • Iaztik datorren joerari eutsiz, Euskaltzaindiaren Hiztegia izan da gehien kontsultatu den edukia: 205.666 bistaratze izan ditu urrian. Atzetik, Euskal Onomastikaren Datutegia (83.168 bistaratze) eta Orotariko Euskal Hiztegia (47.267). Arauen kontsulta ere areagotu da, eta urrian 11.754 bistaratze izan ditu atal garrantzitsu honek.
  • Guztira, irailean eta urrian 167.398 bisita jaso ditu gure atari digitalak. Beraz, eskerrik asko erabiltzaile guztioi.

    Pantaila argazkia

 

XXII. Jagon jardunaldia aurkeztuko da, bihar, Gasteizen

  • Bihar, arazoak 7 dituela, XXII. Jagon jardunaldiak aurkeztuko ditu Euskaltzaindiak, Gasteizen. Agerpena Montehermoso Kulturunea-Euskararen Etxean izango da, goizeko 11:00etan.
  • Azken mendeetan atzerakada izan ondoren, azken hamarkadetan nabarmen hobera egin du euskararen egoerak Araban. Arazoaren 17an egingo den jardunaldian aldaketa horren dimentsioa eta ezaugarriak izango dira hizpide, Arabako ordezkaritza herritar, profesional eta instituzional zabal baten eskutik.
  • Parte hartuko dute: Roberto Gonzalez de Viñasprek (euskaltzain urgazlea eta Euskaltzaindiaren ordezkaria Araban); Sagrario Alemanek (euskaltzaina eta Sustapen batzordeko burua); eta Iñaki Martinez de Lunak (urgazlea eta Sustapen batzordeko kidea).

    image2
    (Iaz, Baionan antolatu zen Jagon jardunaldia).

 

'Baya libradu guaiguiçuz gach gustiric'

  • Ostiralean, Joan Perez Betolazaren doktrinaren faksimile-edizioa oparitu zion Eusko Legebiltzarrak Euskaltzaindiari. 1596an argitaratu zen, Bilbon, eta euskaraz daukagun doktrina zaharrena da.
  • Egun berean, hitzarmen akordio berria sinatu zuten bi erakundeek, 2011n abiatutako bideari jarraipena emanez.
  • Eusko Legebiltzarraren egoitzan eginiko agerraldian, dokumentu berria izenpetzeaz gain, ohiko opari trukaketa egin zen. Bertan, Euskaltzaindiak Ramos Uranga artistaren irudi batean oinarritutako David Abajoren eskultura bat eskaini zion Bakartxo Tejeriari, eta, ordainez, Legebiltzarreko lehendakariak Betolazaren doktrinaren faksimile-edizioa oparitu zion Akademiari. Gainera, faksimil horren lehen alea da Euskaltzaindiak jaso duena.

    image1
    (Patxi Uribarren eta Sagrario Aleman euskaltzainak, faksimile-edizioa aztertzen)

    image11

 

Euskararen normalizazioari buruzko proiektuak gauzatuko dituzte Eusko Legebiltzarrak eta Euskaltzaindiak

  • Bi erakundeek lankidetza-hitzarmena berritu dute, gaur, Legebiltzarreko Tomas Moro aretoan.
  • Lankidetza hau euskararen lurralde guztietako erakundeekin eta eragileekin partekatu nahi dute, betiere bakoitzak dituen prozedura-arauak errespetatuz.
  • Hitzarmen honen indarraldian, euskaraz sorturiko testu juridikoen erakusketa ibiltaria antolatzeko borondatea dute bi erakundeek.
  • Izaera lexikografikoa duen hiztegi juridikoa ere ondu nahi da.

    FullSizeRender 2
    (Bakartxo Tejeriak eta Andres Urrutiak Tomas Moro aretoan sinatu dute akordio berria)

  • Andres Urrutia (euskaltzainburua): “Urte batzuen ondoren, berriro ere datoz Eusko Legebiltzarra eta Euskaltzaindia euren arteko harremanak berrestera eta aurreratzera. Harreman horietan, alabaina, helburu zehatzak garatu nahi ditugu bi erakundeok, gerora gizarteari berari eskaintzeko modukoak direnak”.
  • Bakartxo Tejeria (Eusko Legebiltzarreko lehendakaria): “Lan guzti hauek helburu bakarra dute: euskaldunei, euskal herritarrei eta herri honen erakundeei zerbitzu ematea”.

 

Plazaberrin harpidetu:

Sare sozialetan:

Twitter

 

Gure agendan harpidetu:

Azken argitalpenak

  • Sierra de Tolono portada

    Sierra de Toloño, nexo de la Montaña y la Rioja Alavesa

    Egilea: José Ángel Chasco Oyón

  • Piarres Larzabalen antzerkigintza: 1950-1982. Euskarazko antzerki identitarioaren paradigmak

    Egilea: Isabelle Echeverria

  • Amiküze eskualdeko eskuara

    Egilea: Iñaki Camino

  • Euskararen Herri Hizkeren Atlasa, VIII

    Egilea: Euskaltzaindia. Dialektologia batzordea. Atlasgintza lantaldea

  • Argitalpen guztiak ikusi